काठमाडौं । हिमालयन एभरेष्ट इन्स्योरेन्स कम्पनी लिमिटेडकी प्रमुख कार्यकारी अधिकृत(सिईओ) अन्जु श्रेष्ठ अन्तर्राष्ट्रियस्तरको प्रतिष्ठित सम्मानबाट सम्मानित भएकी छन् । उर्नी वमन्स ट्याब्लोइड ‘द भ्वाइस अफ द वमन’ले ‘बेष्ट वमन सिईओ इन स्ट्राटेजिक लिडरसिप–जेनेरल इन्स्युरेन्स–२०२५’द्वारा सम्मानित भएकी हुन् ।

उक्त विशिष्ट अवार्ड प्राप्त गरेपछि खुसी व्यक्त गर्दै श्रेष्ठले उक्त सम्मान केवल व्यक्तिगत उपलब्धिमात्र नभएर समग्र नेपाली बीमा उद्योगको उपलब्धी भएको बताइन् । यसमा सक्रिय सम्पूर्ण महिलाको सामूहिक पहिचान पनि भएको भन्दै उनले आफ्नो टिमको निरन्तर साथ, परिश्रम र प्रतिबद्धतालाई पनि यस सफलताको मूलआधार मानेको बताएकी छन् ।

बेलायतमा मुख्यालय रहेको वमन्स ट्याब्लोइड एक अन्तर्राष्ट्रिय सञ्चार संस्था हो । जसले व्यवसाय, नेतृत्व र उद्यमशीलता क्षेत्रमा विशिष्ट योगदान दिने महिलाहरूको पहिचान र सम्मान गर्दै आएको छ । हरेक वर्ष विश्वभरका प्रेरणादायी महिलाहरूलाई विविध विधामा सम्मान गर्ने क्रममा यसवर्ष श्रेष्ठले बीमा क्षेत्रतर्फको सर्वोच्च नेतृत्व अवार्ड हात पार्न सफल भएकी हुन् ।

वमन्स ट्याब्लोइडका व्यवसाय विकास प्रबन्धक ड्यानियल डी’कोस्टाले भने, ‘महिलाहरूले व्यवसाय र नेतृत्वमा पुर्याएको योगदान अद्वितीय छ । हाम्रो प्रयास उनीहरूको मेहनत र उपलब्धिलाई अन्तर्राष्ट्रियस्तरमा उजागर गर्नु हो ।’

श्रेष्ठको नेतृत्वमा हिमालयन एभरेष्ट इन्स्योरेन्सले बीमा क्षेत्रमा नवीनता, पारदर्शिता र ग्राहकमुखी सेवामा उल्लेखनीय सुधार ल्याएको छ । रणनीतिक योजनाको प्रभावकारी कार्यान्वयन, डिजिटल प्रविधिको प्रयोगर संस्थागत सुशासनमार्फत कम्पनीले पछिल्ला वर्षहरूमा निरन्तर प्रगति हासिल गर्दै आएको छ । साथै, इन्स्योरेन्सले उक्त सम्मान श्रेष्ठको रणनीतिक सोच, दूरदृष्टि र नेतृत्व क्षमताको विश्वव्यापी मान्यता मात्र नभई नेपाली बीमा क्षेत्रको समग्र प्रगतिको सन्देश पनि भएको जनाएको छ ।