काठमाडौं । सुरिलो भावपूर्ण स्वर, आत्मीय डबिङ र संगीतको गहकिलो यात्राबाट दर्शक–श्रोताको मन जितिसकेका गायक विनोद ढकाल अब अभिनयको नयाँ यात्रा सुरु गर्दै छन्। चर्चित रकस्टारका रूपमा परिचित ढकालले एस एण्ड एस प्रोडक्सनको ब्यानरमा निर्माण भइरहेको चलचित्र *‘किन लाग्छ माया’* मार्फत अभिनयमा डेब्यु गरेका हुन्।

निर्माता मोनु खड्का र निर्देशक कुवेर तामाङको सहकार्यमा निर्माण भइरहेको उक्त चलचित्रले पारिवारिक सम्बन्ध, दाजुभाइको आत्मीयता, सामाजिक यथार्थ र भावनात्मक बलिदान समेटिएको कथा प्रस्तुत गर्नेछ। फिल्मको छायांकन असारको पहिलो साताबाट काठमाडौंको दहचोकबाट सुरु भइसकेको छ भने अब पोखरा, चितवन, मुस्ताङ र पूर्वी नवलपरासीका रमणीय स्थलहरूमा छायांकन हुँदैछ।

कलाकारहरूको सशक्त समूह

विनोद ढकालसँगै फिल्ममा धिरेन शाक्य, पवित्रा साकी (मिस पबी), राजेन्द्र खड्की, सुनिल कटुवाल, रविन्द्र खड्का, संजीत भण्डारी, ऋचा थापा, जानबी बस्नेत, हिम्वला गौतम, गीता अधिकारी, सबिन बास्तोला, रवि डंगोल, गोपाल ढकाल, मेघ सुवेदी, महारानी, र निरोज खुलालको अभिनय रहनेछ।

कथा, छायांकन र निर्देशनमा अनुभवी संयोजन

फिल्मको कथा *‘स्याडो रियर’* अर्थात् ‘छायामा लुकेको यथार्थ’ को अवधारणामा आधारित छ। पटकथा तथा संवाद रामकाजी घिमिरेले लेखेका छन्। छायांकन निर्देशनमा ख्यातिप्राप्त रामशरण उप्रेती, संगीतमा आत्मीय भाव समेट्ने पुष्कर सुनुवार, नृत्य निर्देशनमा रामजी लामिछाने र अभि वाग्ले तथा एक्सन निर्देशनमा राजेन्द्र खड्की रहेका छन्।

ढकालको सांगीतिक यात्राबाट अभिनयको पर्दासम्म

विनोद ढकालको नाम केवल गायनमा सीमित छैन। *‘किलो ट्याङ्गो माइक’* टेलिभिजन सिरिजबाट आवाजको दुनियाँमा चर्चा कमाएका ढकालले ‘कामना’ र ‘कायर लाछिहरू’ जस्ता म्युजिक भिडियोमार्फत अभिनय क्षमताको झलक प्रस्तुत गरिसकेका छन्।
डबिङ, जिंगल, डकुमेन्ट्री, विज्ञापन तथा फिल्मका गीतहरूमा उनको विशिष्ट योगदान रहँदै आएको छ।

अब भने ‘किन लाग्छ माया’ मार्फत उनी पूर्ण रूपमा अभिनयको दुनियाँमा प्रवेश गर्दै छन्। आवाज र स्टेजमार्फत दर्शकको मन छोएका ढकाल अब दृश्य माध्यमबाट पनि दर्शकसँग भावनात्मक संवाद गर्न तयार छन्।

स्वरको अनुहार पर्दामा देखिँदै

विनोद ढकालको स्वरमा दर्शकहरूले जुन आत्मीयता महसुस गरेका थिए, अब त्यो स्वरले अनुहार पाउनेछ -सिनेमाको पर्दामा। फिल्मप्रति ढकाल आशावादी छन्। उनी भन्छन्, “चलचित्रको कथावस्तु निकै समसामयिक, यथार्थपरक र भावनात्मक छ। दर्शकको मन छोनेछ भन्ने विश्वास छ। अभिनय मेरो नयाँ यात्रा हो, तर दर्शक-श्रोताको माया मेरो सधैँको साथ हो।”

‘किन लाग्छ माया’ भावनात्मक सन्देश, पारिवारिक आत्मीयता र सामाजिक यथार्थता प्रस्तुत गर्ने कथानक चलचित्र भएको ढकालको दाबी छ । यो चलचित्रले आफूलाई गायकको एउटै पहिचानमा सीमित नराखी, एक सम्पूर्ण कलाकारका रूपमा स्थापित गर्न सक्ने विश्वास ढकालले व्यक्त गरेका छन्।