काठमाडौं । प्रभु बैंकको सञ्चालक समितिबाट तीन जना सदस्य बाहिरिएका छन् भने रिक्त पदमा दुई जना सदस्य नियुक्त भएका छन् । संस्थापक शेयरधनीको समुहबाट प्रतिनिधित्व गर्ने सञ्चालक रमेश सिंह खड्का, शंकर प्रसाद कालिकोटा र स्वतन्त्र संचालक प्रा.डा.गीता प्रधानले पदबाट राजीनामा दिएका हुन् । 

बैंकको २०८१ वैशाख ७ गते बसेको सञ्चालक समितिको ३३५औँ बैठकले खड्का, कालिकोटा र प्रधानले केन्द्रीय समिति समक्ष दिएको राजीनामा स्वीकृत गर्ने निर्णय गरेको हो । 

तीन जना सदस्यहरूको राजीनामा स्वीकृतपश्चात् रिक्त रहेको पदमा संस्थापक शेयरधनी समूहकै तर्फबाट सञ्चालक पदमा ललितपुर जिल्ला ललितपुर महानगरपालिका वडा नं.२ सानेपाका अंगिरमान सिंह र काठमाडौं जिल्ला टोखा नगरपालिका वडा नं.३ का तारा मानन्धरलाई सदस्यमा नियुक्त गर्ने निर्णय समेत बैठकले गरेको छ । 

उक्त जानकारी सञ्चालक समितिले नेपाल धितोपत्र बोर्ड, सिडिएस एण्ड क्लियरिङ लिमिटेड र प्रभु क्यापिटल लिमिटेडलाई बोधार्थ जानकारी गराएको छ ।